إنتخبونى وإبقوا قابلونى

نويت أبقى رئيس
بالمناسبه المناصب لا تؤنث ........ عشان ميطلعش واحد يفكرها رئيسه بتاعه الضوء الشارد
وهذا برنامجى الانتخابى
شوفوا بقه كل الى عايز منى حاجه هعملهاله نيفر نيفر بس بالدور ........ إنت يا إبنى يالى هناك
نبدأ بالشباب


الشباب

عايزين يتجوزوا هجوزكم كلكم
سيتم تجريم المهر والشبكه

الى عايز يتجوز واحده شبه اليسا او هيفاء يؤمر بس وانا هجيب متخصصين فى تحويل بنات مصر الى صور طبق الاصل
الى نفسها تتجوز واحد شبه عمرو خالد او عمرو دياب متقلقش
وده برضو ينطبق على المتزوجين ........ لو واحد عايز يغير مراته ...... او عايز يحتفظ بيها مع بعض التغيير يطمن ...... انا ليه مين غيركم

انا يهمنى فتى وفتاه احلام الشعب

ـــــــــــــــــــــــــ

العمل

بما اننا كشعب نخشى دائما مخاطر العمل الحر
فانا هعمل لكل واحد مشروع صغير وهكتبه باسمى واشغله عندى عشان يضمن مرتبه
والمرتب الى عايزينه وزياده عشان تحوشوا لان مفيش رئيس بعدى هيعمل كده

مش عايزه اقلق الشعب

ـــــــــــــــــــــــــــ

النساء


الى عايزه تعد فى البيت هقعدها والى عايزه تشتغل هشغلها
متقلقوش من شغل البيت فى انسان الى هيعمل كل حاجه هنجيب مجموعه مجانا وبدون رسوم

عايزين نريح الشعب

مفيش عنف بعد النهارده
الى جوزها يضربها تقولى بس وانا هخليه يندم على اليوم الى شافها فيه
وتطمن تماما لانى مش هسمحله انه يطلقها الا لو هيه عايزه
كل مواطن لازم يحس بالحريه فى البيت والشارع

ـــــــــــــــــــــــــــــ

الاطفال


هعمل مراجيح فى كل حته فى مصر
لانى ناويه امرجح الشعب الى مش هيفضله مرجيحه همرجحه بنفسى
لازم اشغل وقت فراغهم بالنوادى والافلام والاتارى وخصوصا الاتارى
لانها بتعلم الاطفال ازاى يبنوا المستقبل والى بيلعب اتارى عارف

اتارى لكل طفل

ــــــــــــــــــــــــــــــ

اطفال الشوارع


الشعب كله هيعيش فى الشارع
ايوه عشان نحقق المساواه
واولاد الشوارع يبقوا زى اولاد الناس

لا تفرقه بين الشعب

ــــــــــــــــــــــــــــ

الغذاء


فيه بيان كان بيقول انكم شعب جعان
ولانى عايزاكم شعب قوى
هعملكم موائد الرحمن ........ طول السنه اربع مرات فى اليوم
وعلى نفقه الدوله متقلقوش خالص

هدلع الشعب

ـــــــــــــــــــــــــــــــــ

الدواء

بما انكم برضوا شعب مريض ومتهالك
فانا هعمل مستشفيات استثماريه عشان مزعلش الاطباء
وعلى احدث طراز من الاجهزه والمعدات
لكن ذات طابع مختلف ......... المستشفى متنقله هتلف على الشعب واحد واحد كل يوم عشان تتاكد من صحه الشعب
والعلاج مجانى ومش بس علاج لأ فى حاجات تانيه كتير

هروق الشعب


ــــــــــــــــــــــــــــــــــ

الفلاح


انا فلاحه وبقولها بعلو حسى فلاحه وحاسه بكل واحد منكم
ولن اتنازلت عن الحياه فى الريف
- بالرغم انه غير آدمى ........ سجن دمه خفيف -

هبنلكم قرى ريفيه جديده على الطراز الاوروبى
- مش عارفه ازاى انما مش هنختلف -
الى معندوش ارض هديله ارض زى ما هو عايز
وحمير وجمال وبقر كله كله

هدخلكم الكمبيوتر فى كل بيت
- بس انتم الى تستخدموه -

ازرع الى انت عايزوه وهشتريه منك بأغلى الاسعار
-يعنى انا هدفع من جيبى-

هعمل الرى بالتنقيط فى كل مكان عشان متصحوش بدرى وتتعبوا وكمان نوفر الميه لانى ناوى ابيعها للدول الاخرى
- تصدير المياه المجففه -
وطبعا الانسان الالى اياه مش هحرمكم منه
وعايزينها تبقى خضراء


ـــــــــــــــــــــــــــــــــــــ

الجو


همنجه لكم الجو على الاخر
هعمل تكييف مركزى فى البلد كلها
اه وفى الشوارع
قلى مين عملها قبلنا ........ لأول مره فى مصر ...... يا مصر يأم العجايب

وكمان شمسيات ايوه عايز شمس تدوس على الريموت وانت ماشى- لا ريموت مين ده هيبقى بالخيال بمجرد متفكر يتحقق كل الى بتحلم بيه - تنزل الشمسيه مش عايز تشيل الشمسيه


ـــــــــــــــــــــــــــــــــ

المناطق الشعبيه

طول عمرى كنت بحلم اعيش فى منطقه شعبيه ........ ده انا قلبى مساكن شعبيه
هخليها منطقه اثريه ايوه والسايح الى يجى يتسوح عندكم طبعاً مش هاقولكم تعملوا فيه ايه

ولو عايزين نقلبها منطقه راقيه واكتب يفط على كل المناطق الشعبيه عشان مينطليش واحد ويقول انه من حى راقى انا موافقه

الشعب عندى سواسيه


ــــــــــــــــــــــــــــــــــ

الصناعه

سأحول كل بيت الى مصنع صغير
- ما احنا اتفقنا ان الشعب هيعد فى الشارع
وان شاء الله ......إإإإإإإإإإن شاااااااااء الله هتبقى منتجات بأعلى جوده وهنافس الدول العظمى
وهنقتحم كل الاسواق المحليه والعربيه والافريقيه والعالميه


ــــــــــــــــــــــــــــــــــــ

المواصلات

عربيه لكل مواطن ........ بإستثناء الاسر كبيره العدد دى ليها اتوبيس
وممكن قطر لو عايزين
- مولع جاهز أخو قطر الصعيد -


ـــــــــــــــــــــــــــــــــــــــ

المعتقلات

انا هلغى كلمه معتقلات من الشارع
والسجون كمان ......... لأنى مقتنع ان السجن افساد
الى بيدخلوا السجن بيطلعوا اسوء بيتنامى فيهم الاجرام

الى هيغلط هعاقبه شخصيا بأنه يخلى وشه فى الحيط ويرفع ايده لفوق لمده تعتمد على نوع الجرم ودى هنحددها فى مشروع القانون الجديد
وممكن اكتفى بأنى أطلعله بالليل أو أجيله فى المنام .......... مش هاقولكم هيجراله ايه ....... وطبعا ولا هو هيفضل منه حاجه تحكيلكم

وهخلى فيه طبيب نفسانى لكل الى دخلوا السجن او المعتقل سابقا حتى يتحرر من السجن الداخلى
ولكل واحد يخطىء فريق طبى متكامل لتحليله ومعالجته قبل معاقبته


ـــــــــــــــــــــــــــــــــ

التعليم


سوف يتم نشر برامج نحو الأونيٌه فى كل مكان
أما التعليم فسيكون بالمجان طبعاً
-إهيه ده مبدأنا كل شىء بالمجان –

فيه نوعين من التعليم فى نفس الوقت على التوازى يعنى ...... زى قضبان القطر

التعليم التثقيفى والتعليم التدريبى
يعنى تتعلم وتتثقف زى ما انت عايز فى المجال الى تحبه
ونعلمك صنعه ونشترى انتاجك بأعلى الأسعار


****************


ولان بعد كل ده هطلع ظالم وقاسى ومعنديش قلب وهتتهمونى بالنفعيه والتربح
فلو فضل فيه صحه
هعد ادعيلكم ان ربنا يهديكم ويرضيكم ويباركلى فيكم

ها إيه رأيكم فيه مش ريس ميه ميه ؟؟؟؟؟؟؟؟؟

دلوقتى أقدر أقلكم وبكل ثقه إنتخبونى .......... وبعد ما انجح إبقوا قابلونى