صور .........من زمان

وانا بتفرج على صور بابا

فيه صوره كان بابا فى بدايه العشرينات , كل الى معاه فى الصوره ناس كبار أو أطفال صغيريين
محاولتش أسأله عن حد من الصغيرين لأنه أكيد مش هيعرف هما بيمثلوا مين دلوقتى
ولا حتى عن الكبار
لكن قلتله بابا هو المكان ده فين؟ , كان فرح مين ده ؟
قالى انه كان فرح واحد صاحبه لما كان بيشتغل فى السبعينات فى محافظه قنا
وأنهم كانوا بيراسلوا بعض ويتصلوا ببعض هاتفيا لفتره طويله بعد بابا ما نقل عندنا

ودلوقتى يا بابا ؟؟

الدنيا تلاهى

...................................

مسكت البوم صورى وأنا بسأل نفسى ليه بنجرى وناخد صوره مع بعض ؟
بكون حزينه وانا ماسكاها دول كانوا اعز اصحابى معقول نبعد كده

ياااااااااااه دايما وفى كل صورنا معاك بكون جنبك!!
مش لأنى بحب أكون فى نصف الصوره ........ لأ

بس لأنى دايما كنت بحاول أقيس المسافه بينى وبينك

................................

فى قوضتى فيه تابلوه فاضى
كل ما يدخل اخويا الصغير يمسكه ويكون على لسانه يسألنى ليه هو فاضى
وبعدين يلعب بيه شويه ويسيبه ويمشى
لكن النهارده مسكه وسألنى ليه التابلوه ده كده؟
قلتله اومال يبقى إزاى؟
قالى يبقى فيه صورة
وعرض عليه انه يجيب صورته قلتله هاتها
ضبطها على قد التابلوه وجاب صور باقى أخواتى وحطهم صغيرين جنبها وسابه ومشى
بعد شويه مسكت التابلوه وشيلت صورهم وحطيتها تحت إزاز الترابيزه

يا إبنى التابلوه مش فاضى ........ انت الى مش واخد بالك