فــَـــــــاتِــــــح شـَـهـيـــــــــة

قصه حلوه أوى قريتها وعجبتنى
أم شافت إبنها بالليل سهران على أحد المواقع الإباحية
ولا زعقتله ولا بهدلته ولا قلتله هتروح النار ولا حتى قفلت جهاز الكمبيوتر وحرمته منه
انما عملت ايه استنت للصبح
وقالت لإبنها ايه لو واحد جعان ينفع نسد جوعه بفاتح شهيه
قالها لأ ........لازم ياكل
قالتله ولو مش عنده أكل ومش لاقى فلوس يشترى اكل يعمل ايه
قالها يصوم

التفاصيل

بصراحه أم ميه ميه

إنما يا ترى يا هل ترى كانت هتتصرف إزاى لو كانت بنتها ؟؟؟؟؟؟؟؟

 

أنــــــــــــا أحتـــــــــــــج

ان يتهمنا الغرب كعرب ومسلمين بالتخلف والإرهاب يمكن ان يكون نابعا من جهل بحقيقه العرب وبمبادئ الإسلام
لكن عندما ياتى برنامج إختراق وهو بيتكلم عن الإرهاب ويعيد حادثه اغتيال الرئيس السادات
والجماعات الإسلاميه
يبقى – ولامؤاخذة- غبى منه فيه

يعنى لو العمليات الإرهابيه هذه قام بها يهود أومسيحيين أو حتى لا دينيين
هل أيضا كانت ستنسب الى دينهم
ليه لما تيجى جماعه او فئه متطرفه لأنهم مسلمين ننسبهم للدين
ونقول ان العيب فى الدين وان الإسلام هو السبب

 

أنــــــــــــــــــا كُنت

من فتره قريبه قابلنى شخص عزيز وفى خلال الكلام
بيقولى انتى متغيره اوى
فبقوله يا ترى للأفضل ولا للأسوء
فبيقولى انه حاسس ان فيه حاجه جديده فى حياتى
هو طبعا عنده حق انا فعلا مكنتش كده

بس مش زى ما هو فاكر
التغيير نبع من الإستسلام للأمر الواقع
يعنى رضيت بكل حاجه حواليه

بعد ما كنت بحاول افك ايديه من القيود وبصرخ واقول لا
سكت وسيبت ايدى مكانها

فلأنه مسمعش صراخى فاكرنى اتحسنت

وعلى رأى أصاله

تعلمت انى أسامح و أعدى ذلة الأيام
تعلمت أرضى بالواقع ولا أتبع سنا الأحلام
ولا أتمنى ولا أستنى

 

أخـــــى الصغيـــــــر

أخويا الصغير بيحفظ القرآن فى الجامع
هو ألثغ فى نص الحروف الابجديه واللغه عنده زفت
وعقدته فى الحياه التشكيل
مره بيتكلم معايا و قالى حاجه غريبه اوى

تصورى الشيخ شعبان حافظ القرآن كله بالتشكيل

هههههههههههههههههههههههههههه
ده كان رد فعلى وبعدين قلتله يعنى هو طبيعى يحفظه بالتشكيل
بصراحه معرفتش افهمه لانه مش مقتنع ان تشكيل الكلام له لازمه
غلبت معاه يا ابنى لما تشكل غلط يتغير المعنى

فى الأخر قالى بصى انا هحفظ كده وبعدين ابقى احفظ التشكيل

مش عارفه مين الى فهمه ان التشكيل حاجه بتتحفظ لوحدها

 

تـــــــــعديــــــــــــــــــــلُ

جائنى بريد إليكترونى بإسم حسيت أنى قريت الإسم قبل كده

الإيميل كان بعنوان nice post
تعليقا على الشعر الفرنسى الى نشرته

مع تعديل للكتابه
أنا بشكر المدون ميلاد يعقوب
الحقيقه عدم كتابتى للأكسنتس كان سببه الأساسى أنى معرفش هيه بتيجى منين على لوحه المفاتيح
أنا فاهمه ان الأكسنتس دى زى التشكيل يعنى مهمه فى النطق


Je voudrais faire des voyages.

Aller très vite, aller très loin...

Je voudrais voir tous les rivages

Des mers que je ne connais point

par les routes blanches et nettes

j'irai plus vite que le vent

roulerais de ville en ville
.
Je voudrais une paire d'ailes

Pour m'envoler au ciel profond

Parmi les vives hirondelles...

Ernest Pérochon

 

Voyages…….ترحــــــــال

دى مقتطفات من شعر فرنسى كنت قريته مره وعجبنى

Voyages


Je vodrais faire des voyages
je voudrais aller tres vite , aller tres loin
je vodrias voir tous les rivages, des mers je ne connais point
par les routes blanches et nettes
j'irai plus vite que le vent
je roulerais de ville en ville
je voudrias une paire d'ailes, pour m'envoler au ciel profond
parmi les vines hirondelles

E. Perochon


كم أودُ أن أقوم برحلات كثيرة
أذهب سريعاً , أذهب بعيداً
أودُ مشاهدة كل الشواطىء , البحار التى لا أعرفها
فى الطرق البيضاء النظيفة
سأنطلق أسرع من الخيال
متنقلاً من بلدٍ إلى آخر
أتمنى زوجاً من الأجنحه لأحلق فى الفضاء بين طيور السونونو


بصراحة الشعر بالذات ميتقريش غير بلغته الأصليه

 

فـَـــــــــنُ الإستقصـــــــــاء ِ

فى أحد محاضرات تصميم المنتج
طرح علينا أستاذنا هذا العنوان
فن الإستقصاء
على أساس أن العميل أو المستهلك هو المصدر الأساسى لفكره المنتج
يعنى السلعه لابد وأن تكون حلم العميل


طبعا كلنا إستغربنا
إيه ده هو الإستقصاء له فن
قالنا آه طبعاً
يعنى مثلا عايز أعمل إستقصاء عن مستوى المعيشة
مش أروح أسأل الناس كده مره واحده حضرتك بتاخد كام

ممكن مثلاً نسأل عن نوع الوجبات الى بيحب يتناولها
ممكن تسأل عن الاماكن الى بيقضى أجازته فيها
هواياته, نوعيه الملابس الى بيحبها

بعدها من مجموع هذه الأسئله تقدر تحدد مستوى المعيشة

أحب أشكر أستاذى على كل الى إتعلمته منه

ودلوقتى يسمحلى اسأله
ما هى السمات التى تجعل من طالب فيلسوفاً للدفعة ؟
لووووووووووووووول


بالمناسبه بقه الإختبار بصراحه مش عارفه مين الى عمله بس شوفت تحليل على مدونه
To be or not to be
عجبنى التحليل مع انى مفهمتش ايه العلاقه ما بين بعض الاسئله والنتائج
وعلى أساس ايه قامت هذه العلاقه

انما دى كانت النتيجه لإجاباتى

Cultural Creative 81% Romanticist 69% Existentialist 63% Postmodernist 56% Fundamentalist 44% Idealist 44% Modernist 44% Materialist 31% What is Your World View? (updated) created with QuizFarm.com

 

اللهم إرحمنــا وإرحم موتانا وموتى البريطانيين

ده التعليق الى ينفع على أحداث إمبارح
يرحمنا من الظلم والإستعباد
من جهاله الجهلاء
وحماقه الحمقى
وإرهاب الإرهابيين
ويرحم موتانا ومنهم طبعا الراجل سفير مصر فى العراق الى قُتِل بالأمس
ويرحم الأبرياء البريطانيين فى حوادث الإرهاب
ويا ترى هيكون تأثيره على العالم وخاصه الإسلامى كسابق تأثير الأربعاء الأسود
- يعنى أربعاء وخميس-

فقد أعلنت الدول الاوروبية حاله التأهب وتؤكد الإستعداد للتضامن مع بريطيانيا
فما هو نوع التأهب وكيف يكون الإستعداد وعلام يكون هذا التضامن ؟

هل ستقوم إنجلترا بما قامت به أمريكا سابقاً فى أفغانستان بس يا ترى هتقوم بيه فين؟
وهل سيكون هذا دافعاًً جديداً لإحتلال مقنع لأراضى عربيه أخرىبمبررات واهية يا ترى هتكون مين؟

 

أهــــــــــــلاً أمــــــــريكــــــــــا

وها هى الإزدواجيه الأمريكيه
تنادى بالحريه وتفشل فى إحترام رايه الحريه فى العالم
وهى حريه الصحافه

تم الحكم بسجن جوديث ميلر الصحفيه بجريده نيويورك تايمز
لعدم موافقتها على الكشف عن المصادر السرية للمعلومات

شكراً أمريكا لأنك دائما تقدمين الدليل على عدم المصداقيه

 

مــــــــــــدد يــا رياســـــــة الجُمهوريـــــــــــــة

أستغفر الله العظيم
أنا والحمد لله متبعه فى حياتى
إذا سألت فسأل الله , و إذا إستعنت فإستعن بالله,

لكن الكوسه هيه الكوسه وإلا الكوسه الى بتطبخ عندنا , ليها طعم ومذاق خاص

طبعا انا كنت إتكلمت عن تغيير روساء تحرير بعض الصحف المصريه
والنهارده هتكلم عن صحيفه نصف الدنيا لكل الدنيا لووووووووووول

كان يترئس التحرير الصحفيه سناء البيسى أما الخليفه فهى الصحفيه أفكار الخرادلى

إستضافها برنامج البيت بيتك للحديث عن مشوارها الصحفى الذى يبلغ 35 عاما
وهى تعمل منذ بدايه الثمانينات كمندوب الأهرام فى رئاسه الجمهوريه

كان فيه سؤال هل بيتم تحديد نوع الأسئه الى ممكن تسئلوها فى المؤتمر الصحفى؟
قالت لااااااااااا إاحنا بنسأل الى عايزينه
إنما هو مع الوقت بنفهم إيه الى ممكن يتسأل وإيه إلى ميتسألش
!!!!!!!!!!!!!!!!!!
-لا تعليق-

السؤال المهم بقه
كان بيدور حول كيفيه إختيارها
وأن إختيارها كان مفاجئه كبيره
خاصه وأنها لم تكن على قائمه المرشحين

فردت السيده أفكار بأن هذا المنصب قد تأخر كثيرا
وهو يعتبر تقديرا لها
وبالرغم من انها لم تكن على قائمه المرشحين إلا انها كانت متأكده أنها ستحصل على المنصب

وبدهاء محمود سعد : يبقى كده فى حد كان بيأكدلك , حد له امر ونهى , حد قالك يا أفكار إطمنى هتكونى رئيسه تحرير

إبتسمت إبتسامه تنم عن السذاجه وأماءت برأسها أاى أن هذا ما حدث

فقالها مين بقه الى كان بيطمنك
قالت مقدرش أقول
-دى أسرار دوله يا جماحه-
لووووووووووووول

إستمر محمود سعد فى مراوغته للبحث عن اعتراف
أستاذه أفكار هل هناك علاقه بين العمل 25 سنه كمندوبه للأهرام فى رئاسه الجمهوريه وبين هذا المنصب
فأسرعت بالنفى
ولكنها سرعان ما أكدت العلاقه الوثيقه وهى تنهى حديثها
أشكر من إختارونى لهذا المنصب وعلى رأسهم السيد رئيس الجمهورية

على رأى فيلسوف الغبره لما سألوه ماذا يعنى عندك إحترام العقول
فرد فى دهشه: وهل يعنى غير التفرقه بين البشر والعجول ؟

أنا أعرف أن مجلس الشورى برئاسه السيد الوزير صفوت الشريف هو الى كان بيختار

ولا دول ولا مؤاخذه بيبقوا صوره

 

تأجيل محاكمة الدكتور ايمن نور

تم تاجيل محاكمه الدكتور أيمن نور
أنا مكنتش فاهمه هو هيتحاكم ليه أساسا لكن فيهم الخير قالوا
انه سيحاكم لإدعائه أن هناك من المساجين يتم تعذيبهم
ونشر صوراً مُـلفقه فى جريده حزبه تفيد بذلك

وحط تحت إدعائه ميت خط
وإلا مُـلفقه دى كمان

هو لفق الصور أما بقه الناس الى بتموت فى المعتقلات من أثر التعذيب ده أجلهم

{وَلِكُلِّ أُمَّةٍ أَجَلٌ{

ويا ريت الى قائمين على التعذيب يكونوا فاهمين كده

}ولكُــل أجــــلٍ كِتــــــــاب{

 

لـًـعبـَــــــــــــــــــــة الــكـَراســــــــــــــــــى

كل كام يوم يتم تبديل وزير مكان وزير
فى محاوله للوصول الى الكرسى المناسب للوزير المناسب
والله الموفق,

..................................................

تغيير الكثير من رؤساء تحرير الصحف المصرية
فى محاولة لظهور دماء جديده
لو كان فيه حد لسه عندة دم اليومين دول

...........................................

ده بقى كرسى نأمل فى تغييره
واحد قاعد على كرسى وزير الدخليه
وبيقول من حق كل مواطن العيش فى أمان
ويجب على سلطات الأمن إحترام حقوق الإنسان
- إيه بتقول إية -
- سمعنى كده تانى-

 

هــل هـــــلالك شهــــــــر- مبــــارك-

يوليو جانا وفرحنا به بعد غيابه

شهر يوليو هل علينا
ويوليو بقه للموظفين ومع العلاوه الجديده
بقه زى القمر الناس كلها مستنياه
زياده عشرين فى الميه –يا بلاش-

الخبر ده نزل فى الجرايد من شهر يناير الماضى
يعنى من سته اشهر

الأسعار إرتفعت أد الزياده تلات مرات

يعنى الموظف فى الأخر هو الى خسران

وبعدين أنا عايزه أسأل حضره الوزير
- مش عارفه وزير إيه بالضبط -

هو حضرتك بتاخد كام ؟
وبتشتغل بيهم ولا زى بقيه العيله من الوزراء ؟

مجلسنا الموقر - ربنا يشفيه-
كان طالب مره بنظره للأجور والمرتبات
وده مكنش المقصود بيه رفع المرتبات بنسبه من المرتب
لا المقصود بيه تعديل المرتبات
التوازن بين كل الطوائف

يعنى مش ناس بتاخد آلاف الدولارات و ناس مرتبها مبيكفيش المواصلات

وبعدين مش لازم الإعلان

عايزين شعار الحكومه يظل كما هو
دعونا نعمل فى صمت

و نحن نشهد لكم بالصمت –إن لم يكن الخرس –