هل لى أن أعود ؟؟؟؟؟

وحشتنى اوى او يمكن حنينى لايام زمان ولمه الاصحاب

يمكن هيه بالذات او اى حد تانى

او مجرد انى عايزه ارجع كل الى كنت اعرفهم لحياتى من جديد

المهم انى عايزه اتصل بيها دلوقتى اسمع صوتها لا انا عايزه اشوفها


مسكت التليفون وقعدت ادور على النمره

ايوه ادى النمره

اضغط على اتصال

جرس طويل ايه الملل ده

جايز تكون مستغربه النمره

وأخيرا جانى صوتها وكأنه يزف الى البشرى


*الو

وبهدوئى المعتاد

ازيك يا ....

*و بشىء من ملامح الاستغراب فى صوتها مين معايا ؟

بابتسامه ايضا هادئه مش فاكرانى؟

*الصوت مش غريب

وهنا تذكرت اسمى فنطقت به بسرعه البرق

*......... ازيك واحشانى بجد

*ياه يا بنتى انتى فينك وعامله ايه

شعرت ببعث جديد لسماع صوتها
الشجى و اجبتها عايشه

انتى واحشنى بجد ونفسى اشوفك

*انتى فين دلوقتى

انا هنا فى القاهره

*من امتى

من سنه وكام شهر كده

*اخص عليكى ومتحاوليش تتصلى

ادينى اتصلت انا فعلا عايزه اشوفك

وبعد مداولات نتقابل فين اتفقنا

ورحت وكانى رايحه ميعاد غرامى

قلبى عمال يرتجف ومبسوطه وحاسه انى طايره من على الارض

اول لما وقعت عنينا على بعض تعالت اصواتنا وطبعا سلام وقبلات واحضان

لحد مهدينا وقعدنا

قعدنا نفتكر

احنا كنا دايما مع بعض

يمكن مكنش اختيار اد مكان قدر

وبعد كده دخلنا على مرحله ما بعد التخرج

بدات تحكيلى عن الى حصلها فى السنتين الى مشفناش بعض فيهم

حسيت اد ايه كنا قريبين من بعض

واننا كنا محتاجين فعلا نتقابل

الاحداث فى حياتها كانت كتيره ومتلاحقه

من شغل لشغل

وتغيير مكان سكنها

خطوبتها وبعدين خطوبتها تانى

احلامها الى حققتها والى لسه محققتهاش والى عايزه تحققها

لحد موصلت للمكروباص الى ركبته وهيه جيه تقابلنى


وهنا وكأنها وصلت لمحطتى انا فسألتنى

*وانتى ايه اخبارك

ابتسمت كالعاده ورديت كالمعتاد

عايشه

*ايه يا بنتى مفيش غير عايشه


دى الحقيقه


انا اتغير فى حياتى تلات حاجات


كنت طالبه وبقيت طالبه بس بشرطه

كنت عايشه مع اهلى ودلوقتى عايشه مع اصحابى

كنت مكتئبه عشان مش عارفه اشتغل ومش عارفه الاقى نفسى

وبقيت مكتئبه لانى بحب شغلى اكتر من اى حاجه تانيه لحد منسيت نفسى


-يعنى ممكن تقولى كده من سىء الى اسوأ-


وفى النقله من بيتنا لهنا سيبت حاجات كتير اوى

يمكن دلوقتى حاسه انى سيبت نفسى هناك

يعنى المفروض اعيد النظر فى موضوع اذا كنت عايشه فعلا ولالأ


وهنا شعرت بالاختناق الذى اشعر به كلما فكرت فى حياتى

بقولك ايه متيجى نتمشى احسن

وفضلنا نلف فى الشوارع الى اصبح مع الاسف هوايتى المفضله

مشينا على اتفاق اننا هنتقابل تانى وعلى طول

بس مشيت وانا عماله افكر فى موضوع انى نسيت نفسى فى بيتنا

نسيت احطها فى شنطه سفرى

تاهت روحى منى فى السفر

وبعدت عن نفسى

حتى انى تقريبا قفلت دماغى ومبقيتش بفكر فى حاجه

زى ما اكون ميته



فهل لى ان اعود

؟؟؟؟؟؟؟؟؟؟



أهكذا أبداً تمضي أمانينا ** نطوي الحياةَ وليلُ الموت يطوينا

تجري بنا سُفُنُ الأعمارِ ماخرةً ** بحرَ الوجودِ ولا نُلقي مراسينا؟

قد كنتُ أرجو ختامَ العامِ يجمعنا ** واليومَ للدهرِ لا يُرجى تلاقينا

هل تذكرين مساءً فوق مائكِ إذ يجري ** ونحن سكوتٌ في تصابينا؟

والبرُّ والبحر والأفلاكُ مصغيةٌ مَعْنا ** فلا شيءَ يُلهيها ويُلهينا

يا دهرُ قفْ، فحرامٌ أن تطيرَ بنا ** من قبل أن نتملّى من أمانينا

ويا زمانَ الصِّبا دعنا على مَهَلٍ ** نلتذُّ بالحبِّ في أحلى ليالينا

خُذِ الشقيَّ وخذْ مَعْه تعاستَهُ ** وخلّنا فهناءُ الحبِّ يكفينا

هيهات هيهات أن الدهرَ يسمع لي ** فالوقتُ يفلت والساعاتُ تُفنينا

فلنغنمِ الحبَّ ما دام الزمانُ بنا ** يجري ولا وقفةٌ فيه تُعزّينا

-----------------------------------



مقطتفات ترجمه

لبحيره لامارتين